NGUTHAITHA ATHURI NA THAITHE ATUMIA

[1]
Ngũthaitha athuri na thaithe atumia
Na thaithe anake ona thaithe airĩtu
Ohamwe na ciana iria nyinyi cia ngenge
Mathikĩrĩrie ũrĩa Roho ekuga

[2]
Roho ekuga nderuta wĩra na njukũ
Na nderuta wĩra na maheni
Na nderuta wĩra na andũ a gĩcambanio
Na nderute wĩra na mwĩgatho

[3]
Ngoro-inĩ cia andũ aingĩ kũiyũire mwĩgatho
Na gũkaiyũra mbara na hinya
Na gũkaiyũra njukũ ona kwĩnenehia
Na ningĩ gũkaga ũhoro wa ma

[4]
Mũrage njukũ na ũthũ na gĩcambanio
Na mũrage ũhinga na rũmena
Na mũrage uhi na thuti cia mwĩrĩ
Nĩgetha Roho atwarane na inyuĩ

[5]
Musa erire Ngai nĩ ngwenda gũkuona
Nake Ngai akĩra Musa atĩrĩ
Gũtirĩ mũndũ ũngĩnyona acoke gũtũra muoyo
Mũndũ angĩnyona no nginya akue

[6]
Ngai erire Musa ere andũ othe metherie
Nĩguo makuhĩrĩrie kĩrĩma
Nĩguo mathikĩrĩrie ũrĩa Ngai ekwenda
Nĩ getha ndakae kũmanina

[7]
Na inyuĩ mũngĩkorwo nĩmuonete Roho
Mũtingĩcoka gwathwo nĩ mwĩrĩ
No nginya mũkue ciĩga cianyu cia mwĩrĩ
Hamwe na merirĩria ma mwĩrĩ

[8]
Na inyuĩ inyuothe rĩu no nginya mwĩtherie
Nĩguo mũkuhĩrĩrie kĩrĩma
Na kĩrĩma kĩu nĩ Roho Mũtheru
Nĩ getha ndakae kũmũnina

[9]
Maũndũ macio mothe muona mwahingia
Matu-inĩ nĩmũkahingũrĩrwo
Nake Roho Mũtheru arĩ mbere yanyu
Tondũ nĩagatuĩka mũira wanyu.