JEHOVA NA JESU NA ROHO MUTHERU ME WENDO UTATHUTHIKAGA

[1]
Jehova na Jesu na Roho Mũtheru
Me wendo ũtathuthĩkaga
No Araika na andũ arĩa Ngai ombire
Nĩo Ngoma ahenagĩrĩria.

Nama gũtianagĩa ona gũtikagĩa
Andũ ega megũkararania
Gũkararanagio nĩ andũ ega na oru
Amwe magatuĩka igai rĩa ngoma.

[2]
Nĩ kwagĩire ngarari mbere ya Ngai
Rĩrĩa ngoma aiyũrirĩe njukũ
Thĩ-inĩ wa Araika othe magĩkararania
Amwe magĩtuĩka igai rĩa ngoma.

[3]
Ngarari nĩcio thũ cia ũhoro wa ma
Ciahurunjire kĩrĩkanĩro kĩa araika
Othe magĩkararania
Amwe magĩtuĩka igai rĩa ngoma.

[4]
Ibrahimu na Loti matũrĩte me ngoro ĩmwe
Rĩrĩa magĩire indo
Loti athiĩ Sodomu magĩkararania
Amwe magĩtuĩka igai rĩa ngoma.

[5]
Nuhu oima thabina na andũ makĩingĩha
Othe magĩaka kĩbabeli
Makĩaga mahoya magĩkararania
Amwe magĩtuĩka igai rĩa ngoma.

[6]
Musa atongoririe atheru a Jehova
Mathiĩ Kanani makahurũke
Me werũ-inĩ Dathani makararania
Amwe magĩtuĩka igai rĩa ngoma.

[7]
Jesu oka gũkũ thĩ nĩ amũrire andũ
Mĩrongo mũgwanja akĩmatongoria
Amera mamũrie magĩkararania
Amwe magĩtuĩka igai rĩa ngoma.

[8]
Atũmwo na Ayahundi makararania
Me itũra-ĩnĩ rĩa Anitiokĩa
Magayũkanire icungĩ igĩri
Amwe magĩtuĩka igai rĩa ngoma.

[9]
Athaithi Ngai thaithai Ngai na ma
Mahoya nĩmo maninaga ngarari
Cia andũ aingĩ magikararania
Amwe magĩtuĩka igai rĩa ngoma.